LEGANES, ILOILO– May person of interest na ang mga pulis sa nagluthang-patay sa 19-anyos nga anak ni Leganes Sangguniang Bayan (SB) Member Larry Labuson sa Metropolis Avenue, Jaro, Iloilo City.
Ang biktima nga si Carl Dominic Labuson ang nakaangkon sang pilas sa dughan kag ulo sa shooting incident nga natabo pasado ‘las siete sa gab-i sang nagligad nga Sabado, Abril 3.
Base sa imbestigasyon sang otoridad, ang pagluthang-patay kay Labuson ang may kaangtanan sa frustrated robbery nga natabo sa amo man nga gab-i sa isa ka grocery store sa Jardeleza Arcade sa banwa sang Leganes.
Ginapahayag nga gintuyo sang suspek nga kawatan ang grocery store apang todo sa pagbato si Jenny Panelo, ang babaye nga amo kuntani ang biktima rason nga wala natigayon ang krimen kag nagpalagyo ang suspek padulong sa syudad sang Iloilo.
Ang grocery store kun sa diin natabo ang frustrated robbery ang yara lang sa tabok sang gasoline station kun sa diin mapa-gas up kuntani si Labuson sang iya motorsiklo.
Nakit-an ni Labuson ang natabo bangud nakasinggit pa si Panelo rason nga wala niya gindayon ang pagpa-gas up kag gilayon nga ginlagas ang suspek kag nag-abtanay sila sa Metropolis Avenue sa Jaro kun sa diin natabo ang pagluthang sa iya.
Sa interview sang Bombo Radyo kay Police Staff Sergeant Leo Barnuevo, assigned investigator sang Leganes Municipal Police Staion, iya ginpahayag nga may ginpakita sila nga laragway kay Panelo kay may natumod nga
kaangay nga features sa suspek nga nagtuyo sa pagpangawat sa grocery store kag amo man ang nagluthang kay Labuson.
Indi 100% nga sigurado si Panelo apang nagasibo ang kataason sang lalaki nga 5’7″, dark ang complexion, kag maniwang ang panglawason.
Magluwas diri, wala na sang specific details nga mahatag si Panelo bangud naka-face mask ang lalaki sang natabo ang krimen, naka-itom nga bayo, kag naka-helmet.
Indi man masaligan ang closed circuit television camera (CCTV) footages bangud ang footage sa gasoline station ang nagapakita sa pagpatughong kuntani ni Labuson sa iya motorsiklo apang wala sang close-up shot sa suspek.
Gin-athag man ni Barnuevo nga yara sa Leganes Plaza [atubang sang Jardeleza Arcade] nagabantay ang mga pulis apang ulihi na nareport sa ila ang insidente.
Nagatingob man ang pwersa sang Jaro Police Station sa imbestigasyon sang Leganes PNP agud mapadasig ang pagkilala kag kag pagdakop sa suspek.
Sa interview sang Bombo Radyo kay Police Captain Eduardo Siacon Jr., hepe sang Jaro Police Station, iya ginpahayag nga ang lalaki nga yara sa laragway kag ginpakita kay Panelo ang may yara na nga daan sang criminal record kag ginabantayan man sang mga pulis bangud sa kaangay nga aktibidad nga nakomiter sang una.
Gin-athag ni Siacon nga indi conclusive ang statement ni Panelo bangud madulom man sang amo nga gab-i sang natabo ang krimen.
Natukiban man sa imbestigasyon sang pulis nga indi Aerox ang motorsiklo ang ginsakyan sang suspek kundi Honda Click.
Sang gintuyo nga kawatan sang suspek si Jenny Panelo samtang yara ini sa cashier’s booth sa grocery store sa Jardeleza Arcade, nagpamalibad si Panelo nga ihatag ang kwarta kag sa pagkamatuod, napungkoy pa niya sang kahoy ang suspek.
Nagpalagyo ang suspek sang ulihi bangud may mga customer na nga nag-abot kag didto lang kag nakasinggit agud magpangayo sang bulig si Panelo.
Suno kay Panelo, posible nga wala gid nag-alang alang kag nagbulig gilayon si Labuson nga lagson ang suspek bangud kilala niya si Panelo bangud magkasilingan sila sa isa ka subdivision sa Leganes.
Padayon pa subong ang imbestigasyon sang mga pulis sa insidente.
Una naman nga nagpahayag si SB Member Labuson nga magahatag siya sang P100,000 sa sin-o man nga makatudlo sa nagluthang-patay sa iya anak.
