ILOILO CITY- Nagsabat na ang aktor nga si John Estrada kasunod sang isyu may kaangtanan sa relasyon sini sa iya asawa nga si Priscilla Meirelles.
Sa iya Instagram story, ginpahayag ni Estrada nga mutual ang ila desisyon nga indi anay mag-updanay.
Ginpanginwala man ni Estrada nga may relasyon sila ni certain Lily Hallman, kag ginsiling nga nakilala lamang niya ini sa Boracay sang nagbisita ini sa isla.
Naghingyo naman sang privacy ang aktor bangud suno sa iya, isa ini ka private family matter.
Nagpaandam man ini nga pasakaan niya sang kaso ang sin-o man nga nagapalapta sang sala nga impormasyon tuhoy sa ila relasyon.
Samtang, gilayon naman nga nagsabat si Mereilles sa post ni Estrada kun sa diin ginsiling sini nga wala sang natabo nga mutual agreement sa ila separation kag ginkakibot sini ang pahayag sang aktor.
Indi ini ang una nga tion nga nagtuhaw ang isyu sa ila relasyon bangud sang Abril 2023, gin-ako ni Meirelles nga problemado ang ila pag-updanay apang ginpili nila nga mag-upod sa gihapon.
Sanday Meirelles kag Estrada ang nagpakasal sang 2011 kag nag-angkon sang anak nga babaye sang 2012.
