ILOILO CITY- Nagapati si Kabataan Partylist Rep. Raoul Manuel nga indi sabat ang Mandatory Reserve Officers’ Training Corps sa mental health problem sa mga pamatan-on ukon mga estudyante.
Sa interview sang Bombo Radyo kay Rep. Manuel, iya ginpahayag nga sa baylo nga makabulig, mahimo nga magtuga pa ini sang negatibo nga epekto sa mental health sang mga estudyante.
Suno sa Ilonggo nga mamalidha, lain ang approach sang Reserve Officers’ Training Corps bangud nga komon diri ang singgitanay kag iban nga sahi sang pamaagi sa pagtrato sa mga estudyante nga indi makapaayo para sa ila.
Pahayag sang opisyal, mas maayo nga tutukan sang gobyerno ilabi na sang Department of Education ang pag-hire sang guidance counselors nga sarang nga magbulig sa mga estudyante nga may mental health issues.
Nahibalaun nga una na nga ginpanawagan ni Manuel kay President Ferdinand Marcos Jr. nga magdeklarar sang mental health emergency sa pungsod matapos narecord ang masobra 400 ka student suicide cases sang nagligad nga academic year.
Plano ni Manuel nga mag-file sang House resolution nga nagapangabay sa administrasyon nga magdeklarar sang emergency kag imbestigahan ang mental health crisis.
