ILOILO CITY- Ginahulat pa ni Kabataan Partylist Rep. Raoul Manuel ang mangin desisyon sang Committee on Rules sa kongreso kun sa ano nga kumitiba i-refer ang House Resolution 721 nga iya gin-file.
Ang resolusyon nagaduso sang pagpatigayon sang legislative inquiry in aid of legislation may kaangtanan sa kontrobersyal nga Ungka kag Aganan flyover.
Sa interview sang Bombo Radyo kay Kabataan Partylist Rep. Raoul Manuel, iya ginpahayag nga samtang nagahulat siya sa masunod nga tikang sang nasambit nga kumitiba, padayunon sini nga dal-on ang kawsa nahanungod sa amo nga mga proyekto.
Suno kay Manuel, indi lamang ini concern sang mga Ilonggo kundi sang bilog nga Pilipinas bangud kwarta sang mga pumuluyo ang gingasto diri.
Nagalaum naman si Manuel nga suportahan sang kaangay niya nga mga Ilonggo nga mamalidha ang amo nga resolusyon.
Una na nga nag-coauthor sa resolusyon sanday Iloilo 2nd District Rep. Michael Gorricera kag Iloilo 3rd District Rep. Lorenz Defensor.
