ILOILO CITY – Posible nga mabaton na sang mga empleyado sang Iloilo CIty Hall ang kabug-usan nga bonus subong nga semana.
Ini matapos nga ginkumpirma ni Iloilo City Mayor Jerry Treñas nga antes pa man ang Disyembre 20, mapasulod na sa ATM accounts ang bonus nga nagalab-ot sa P26,000.
Sa interview sang Bombo Radyo City Treasurer Jinny Hermano, iya ginpahayag nga nagalab-ot sa P11,000 ang Collective Negotiation Agreement, P5,000 ang Productivity Enhancement Incentive samtang P10,000 ang Services Recognition Incentive.
Suno kay Hermano, antes pa man ihatag ang bonus, ini ang maga-agi anay sa City Budget Office, City Accounting Office, City Treasurer’s Office kag City Mayor’s Office.
Ginpahayag ni Hermano nga lakip sa mga magabaton amo ang regular kag contractual employee lakip na ang elective official kag executive assistant.
