Magahulat na lang ang kampo ni suspended Negros Oriental Rep. Arnie Teves Jr. nga may ma-file na nga kaso kaangot sa Degamo assassination antes magsabat sa latest pronouncements ni Justice Secretary Jesus Crispin ‘Boying’ Remulla.
Ini ang sabat sang head legal counsel nga si Atty. Ferdinand Topacio matapos ginpahayag ni Remulla nga si Teves ang executive producer sa amo nga krimen kag siya ang nagahatag sang pondo para sa armas, hideout, kag salakyan sang mga suspects.
Gintudlo naman nga casting director ang gin-alegar co-mastermind, ang military reservist kag long-time bodyguard ni Teves nga si “Marvin Miranda” nga nadakpan na sang National Bureau of Investigation sa Antique.
Ginpahayag man ni Remulla nga case closed na ini kag magasugod na sila sa prosecution.
Suno naman kay Topacio, magasabat lang ugaling sila sa sini nga mga akusasyon kun mapasaka na ang mga panumbungon.
Ginpahayag man sini nga indi husto nga venue ang public opinion agud matumod kun guilty ukon inosente ang isa ka tawo.
Dapat man suno kay Topacio nga tutukan kun ngaa ginalapas sang Department of Justice, National Bureau of Investigation, kag Philippine National Police ang Constitutional rights sang mga naka-detain nga mga tawo kaangot sa criminal investigations nga kaangot kay Cong. Teves.
Ginkwestyon man sang abogado kun ngaa ginabalagan ang detainees nga makaangkon sang abogado kag ngaa gina-subject sila sa pressure agud nga mag-testify sang sala batok kay Teves.
Sa bahin naman ni Remulla, ginpahayag sini nga sundon sang gobyerno ang layi– buot silingon, magapaidalom si Teves sa preliminary investigation kag mahimo maka-file sang counter-affidavit.
Handa man ang gobyerno nga magpangayo sang bulig sa International Criminal Police Organization ukon INTERPOL.
Suno kay Remulla, mahapos lang makuha ang Blue Notice apang mabudlay magkuha sang Red Notice bangud kinahanglan anay nga mapasaka ang kaso.
Suno sa Interpol website, ang notice ang mahimo ma-isyu sang General Secretariat kun may yara sang request ang member country.
Ang blue notice ang gina-isyu para sa additional information samtang ang Red Notice naman ang gina-isyu para matumod ang lokasyon kag madakop ang isa ka tawo nga wanted sa prosecution ukon nagapalagyo sa iya nga sentensya. ##
