Gin-aresto sang mga pulis ang masobra 180 ka mga tawo sa 10 ka syudad sa Netherlands nga nagaprotesta batok sa mga ginapatuman nga COVID-19 restrictions partikular na ang night-time curfew.
Ini na ang ikatatlo nga adlaw sang asud-asud nga riot sa pila ka mga syudad sa amo nga pungsod.
Sa pila ka mga shops sa Rotterdam, nagagamit na sang water cannon ang mga pulis agud punggan ang mga nagaprotesta nga mga tawo.
Nag-isyu naman si Rotterdam Mayor Ahmed Aboutaleb sang emergency decree nga nagahatag sang dugang nga gahum sa mga pulis nga mag-aresto sa mga protesters bangud ginapahayag nga may yara pa sang mga nagapangawat kag nagapang-vandalize.
Sa iban nga mga syudad, mas agresibo man ang mga protesters kun sa diin ginapangsunog ang mga salakyan kag ginahaboy sang bato ang mga pulis.
Ginkondenar naman ni Prime Minister Mark Rutte ini nga “criminal violence” kag ginpahayag naman sang justice minister nga magapabilin ang ginapatuman nga curfew.
Ginapahayag nga mga teenagers ang kalabanan nga nagaprotesta.
Ang Netherlands ang may yara na subong sang kapin 1 million ka kaso sang COVID-19 kag masobra 13,500 ang napatay.
