ILOILO – Ginasigurado sang Local Government Unit (LGU) sang Dumangas nga maatipan kag mabuligan ang kapin 300 ka mga pasahero nga na-stranded sa Dumangas port bangud sa malain nga tiyempo.
Ini bangud nalakip ang banwa sa ginpaidalom sa Typhoon Signal Number 2.
Sa interview sang Bombo Radyo kay Dumangas Mayor Ronaldo ‘Onal’ Golez, iya ginpahayag nga naka-augment na ang Municipal Disaster Risk Reduction and Management Office (MDRRMO), ang mga volunteer groups, rescuers, kag medical team sa pagbulig man sa mga tawo sa puerto.
May ginhatag man nga pagkaon ang banwa para sa ila, kag suno sa alkalde, sa tion nga maglain pa gid ang panahon kag indi na masarangan sang banwa, yara man ang Department of Social Welfare and Development (DSWD) Regional Office sa paghatag sang bulig.
Dugang pa ni Golez, nagapakig-angot man sila sa Philippine Port Authority (PPA) para sa coordinated nga mga akto.
Ginpahayag man sang alkalde nga gin-abisuhan na ang mga mangingisda nga ipaiway anay ang pagkadto sa laot agud malikawan ang disgrasya.
Kaangot naman sa mabaskog nga daludo sang tubig, 23 sa 45 ka mga kabarangayan sa banwa ang yara sa coastal area kag amo ang labi nga ginakabalak-an nga alagyan sang baha.
Suno kay Golez, may yara na sang instruksyon nga nahatag sa mga opisyal sa barangay nga mangin alerto kag i-mandu ang gilayon nga evacuation sa tion nga nagataas na ang tubig.
Indi man problema suno sa natungdan ang evacuation bangud may duha ka sentro nga nahamtang sa duha ka barangay sa Dumangas magluwas pa sa mga eskwelahan.
Nahibaluan nga suspendido man ang klase sa Dumangas sa Pre-school tubtob Senior High School sa publiko kag pribado nga eskwelahan.
