Ginpunto ni private prosecutor Lorna Kapunan nga wala sang rason ang kampo ni Vice President Sara Duterte nga likawan ang pagtalakay sa mga ebidensiya nga ginpresentar sang prosekusyon sa impeachment court sa pagpadayon sang trial sa Nobyembre 9.
Pahayag pa ni Kapunan, gin-ugyonan na sang impeachment court ang pagbaton sang importante nga mga ebidensiya nga ginpresentar sang prosekusyon kaangot sa akusasyon sang unexplained wealth.
Apang, wala na nalakip sa mga ebidensiya ang mga dokumento sang Commission on Audit (COA) matapos ini nga ginbalibaran sang korte.
Suno sa korte, napresentar na ang amo nga mga dokumento sa una nga artikulo sang impeachment nga may kaangtanan sa ginapahayag nga sala nga paggamit sang confidential funds ni Duterte.
Gin-abi-abi man ni Kapunan ang ruling sang impeachment court nga naga-reject sang general objections sang defense sa pagbaton sang iban pa nga ebidensiya nga may kaangtanan sa ikaduha nga article sang impeachment, nga nagatalakay sa ginapahayag nga unexplained wealth sang bise presidente.
Matandaan nga gintawag sang kampo ni Duterte nga “fishing expedition” ukon pagpangita sang ebidensiya nga wala sang klaro nga direksyon ang tikang sang prosekusyon sa pagkuha sang mga dokumento paagi sa subpoenas nga gin-isyu sang korte.
