ILOILO CITY- Sa baylo nga mangin malipayon ang kasal sang bride and groom sa Amlan, Negros Oriental, napun-an ini sang pagkadismaya kag kaugot bangud sa ginpahayag pagsinuplado sang pari nga nag-officiate sang kasal.
Ini bangud nga samtang nagamartsa pa lang ang bride padulong sa altar, nagsugod na sa iya misa ang pari rason nga halos nagdalagan na lang ang bride padulong sa altar.
Ang ginkasal amo sanday Janine Sagario kag Jove Sagario.
Suno pa sa mga nagtambong sang kasal, matapos ang seremonya,wala man lang naghambal ang pari sang “Kiss the Bride” kag nag-walk out ini gilayon pagwa sa simbahan.
Naghilibion naman ang couple bangud sa aktwasyon sang pari nga nagguba sang ila moment.
Nagpaathag naman ang bride kaangot sa alegasyon nga na-late sila sa ila schedule rason kun ngaa naakig ang pari.
Suno sa bride, una nga naka-schedule ang ila kasal sang Hunyo 8, las-otso sa aga.
Apang suno sa iya, sang Hunyo 7 sang gab-i, ginpahibalo sila sang isa sa ila sponsors nga gin-reschedule sang simbahan ang ila kasal kag sa baylo nga 8:00 am, ginhimo ini nga 9:30 am.
Pahayag niya, sang Hunyo 8, 9:00 am pa lang sang nag-abot sila sa simbahan.
Didto na nangakig ang mga staff sang simbahan kag ginhambal nga late sila sa schedule nga 8:00.
Dugang niya, wala na siya nakasabat sa staff kag nagdiretso na lang ini sa entrance sang simbahan.
Sang yara pa lang ini sa pwertahan, didto na kag nagsugod ang pari sang seremonya.
