ILOILO CITY- Tun-an pa sang kampo sang apat ka mga jobhires sang Iloilo City Hall ang pagpasaka sang kaso kriminal batok sa tatlo ka mga regular employees sang Iloilo City Government nga ginaalegar nagpatigayon sang electioneering.
Sa interview sang Bombo Radyo kay Atty. Eldrid Antiquera, abugado sang mga tagreklamo nga sanday Dennis Biñas, Julia Bitonga, Jena Jose kag Donephine Dominggo, iya ginpahayag nga sang Hunyo pa sang nagpalapit sa iya ang apat ka mga jobhires agud ireklamo sanday Danny Tan, Vincent Dela Cruz kag Eireen Manikan.
Suno kay Antiquera, isa-isa nga nag -execute sang affidavit ang mga tagreklamo sa diin ila ginpahayag nga ginpatawag sila sadtong Mayo 8 agud piliton nga suportahan ang kandidatura ni anay Iloilo City Mayor Jose Espinosa III kag kun sila ang indi magsuporta, pahalinon sila sa trabaho.
Ginpahayag ni Antiquera nga ginpasa na nila ang formal complaint kay Iloilo City Mayor Jerry Treñas nga ginpasaka naman sang alkalde sa City Legal Office.
Sa subong, ginahulat pa sang mga tagreklamo ang mangin tikang sang City Legal Office tuhoy sa ila complaint.
Nahibaluan nga sa nasambit nga reklamo, gin-alegar sang mga jobhires nga ginlapas sang mga regular employees ang fair election act, civil service law, kag Code of ethical standards for government officials and employees.
