ILOILO CITY – Nagapabilin nga wala sang pagbag-o sa numero sang Coronavirus Disease 2019 (COVID-19) sa Western Visayas humalin sang Abril 10.
Suno kay Dr. Mary Ann Sta. Lucia, pinuno sang Health Promotion Cluster kag spokesperson sang Department of Health 6, iya ginpahayag nga nagapabilin nga 39 ang kumpirmado nga kaso sang COVID-19 sa Western Visayas sa diin pito ang patay kag anum ang naka recover.
Ginpahayag ni Sta. Lucia nga lunsay nag negatibo sa COVID-19 ang 76 ka mga pasyente nga ginpaidalom sa laboratory test.
Sa 39 ka kumpirmado nga kaso sa Western Visayas, anum diri ang gikan sa Aklan, duha ang sa Antique, apat sa Capiz, 15 sa probinsya sang Iloilo, isa sa Negros Occidental, pito sa Bacolod City, apat sa Iloilo City kag nagapabilin naman nga wala sang kaso sang probinsya sang Guimaras.
