Kun may operasyon gani ang mga kawatan, preparado gid sila nga tabunan ang ila nawong agud nga indi madali nga makilala sang mga tawo sa palibot.
Amo man sini ang ginhimo sang isa ka armado nga lalaki sang nangawat ini sa New York; apang na-remalaso ini kag nakilala gihapon paagi lamang sa iya colorful nga underwear!
Natabo ang pagpangawat sa baligyaan sang sigarilyo sa Queens County sang Septyembre sang nagligad nga tuig.
Suno sa mga dokumento nga ginpasa sa korte sang nagligad lang nga semana, tatlo ka naka-maskara nga lalaki ang nagguwa sa salakyan kag nagsulod sa shop.
Duha sa ila ang nagtaya sang pusil sa empleyado kag sa mga kustomer, samtang ang isa naman ka lalaki ang nangamot sa pag-bukas sa cash register kun sa diin nakuha ang masobra P166,000 nga cash; P55,000 nga balor sang sigarilyo kag medicinal marijuana products, kag apat ka smartphones.
Mabudlay makilala ang tatlo bangud sa ila ginasuksok nga hoodie kag maskara, apang klaro sa surveillance videos ang colorful kaayo nga briefs sang ikatatlo nga kawatan nga nagalabaw sa iya nga low-waist pants — makit-an nga may naka-imprinta nga puti nga letter R kag may yellow naman nga naka-imprinta nga 1990.
via Brooklyn Eagle
Ginpalapta sang mga pulis ang video, tubtub nga may nag-tip sa ila kun sa diin naga-istar.
Suno sa tipster, nakit-an sini ang social media account sang amo nga suspek, kag nakit-an sa isa sa mga laragway sini nga suksok niya ang amo nga itsura sang briefs.
Nag-imbestigar ang otoridad tubtub nga nakit-an nga nagsanto ang identity sang amo nga lalaki sa video sang shop kag sa mga laragway sini sang nauna ini nga naaresto bangud sa daan nga kaso.
Gindakop siya sa iya balay sa Queens paagi sa gintingob nga pwersa sang New York Police Department-Bureau of Alcohol, Tobacco and Firearms joint task force.
Sa subong, nagahulat ini sang iya schedule para sa arraignment sa federal court sa Brooklyn.
Nagapabilin naman nga at large ang duha pa ka kaupdanan sini nga spotted nga naghimo sang krimen. #
