Kun may kawatan, ginalauman nga magataghol ang ido kag magabulig agud mapahibalo sa iya nga agalon nga may tawo nga nagapanghilabot sa ila balay.
Lain ang natabo base sa gin-share sang San Diego Police Department sa California: Ang ido nahimo pa nga partner-in-crime sang suspek!
Base sa police report, nakit-an ang gina-alegar suspek sa CCTV footage nga nagatuyo nga kawaton ang bike halin sa garahe sang biktima.
Indi lang ini basta-basta nga bike bangud isa ini ka 2019 black Electra 3-speed bicycle nga ginabanta nagabalor sang $1,300 ukon ginabanta P72,980.
Sa isa ugaling ka pinasahi nga hitabo, sang malagyo na kuntani ang suspek, nagsulod ang ido sa garahe. Nakit-an nga ginahulag hulag sang ido ang iya nga ikog kag nagadugsing sa suspek.
Nagtinir man ang lalaki sa garahe kag ginhikap-hikap anay ang ido. Sa audio recording sang CCTV, mabatian pa ang lalaki nga nagsiling: “You’re the coolest dog I’ve ever known. I love you, too. You’re a sweetheart.”
Mabatian pa nga ginpamangkot pa sang suspek ang ido kun diin ang iya nga tag-iya, kag nagpanugyan pa ini nga dasun gani, indi gid pagbayaan nga bukas ang pwertahan.
Amo lang na galing bangud wala gid napunggan ang suspek: gindala gid sini ang bike.
Sa subong, nagapangayo ang pulis sang impormasyon halin sa publiko kaangot sa amo nga identity sang amo nga lalaki. #
