Ginbombahan sang Estados Unidos ang military targets sa Kharg Island sa Iran lakip na ang bunkers, radar station, kag ammunition storage.
Natabo ang pagpang-atake antes ang deadline nga ginhatag ni US President Donald Trump sa Iran agud makignegosyar.
Santo sa inisyal nga impormasyon, wala gin-igu sang military strikes sa northern side sang isla ang oil facilities, kundi ginpili gid lamang ang military bunkers kag iban pa nga storage kag military facilities.
Ginaalegar nga wala man sang tropa nga ginpadala sa ground agud ma-involve sa amo nga atake.
Ini na ang pangaduha nga tion nga gin-atake sang Estados Unidos ang Kharg.
Sang nagligad nga bulan, gin-anunsyo ni Trump nga gin-atake man nila ang military targets sa amo nga isla. Gintawag niya ini nga “crown jewel” sang Iran. Sang amo nga tion, nagsiling si Trump nga wala nila anay gintandog ang oil facilities, apang kun indi pagbuksan sang Iran ang Strait of Hormuz, mapilitan sila suno sa iya nga atakehon man ini.
Ang Kharg amo ang isla sa northern end sang Gulf nga malapit sa syudad sang Bushehr. Ini nga five-mile-long coral island sa Persian Gulf ang makit-an 27 milya halin sa mainland.
Halos 90% sang oil exports sang Iran ang nagaagi sa sini nga isla. Ginakabig ini nga isla bilang “most sensitive economic target.”
Santo sa pinaka-ulihi nga gindeklarar ni Trump, may kutob lang Martes sang gab-i ang Iran agud nga magsugot sa negosasyon, bangud kun indi suno sa presidente, maga-atake sang mas mabaskog ang US.
As of writing, alas singko sa hapon ang oras sa Tehran.
