Nagmadinalag-on ang mga doktor sa Massachusetts General Hospital sa Estados Unidos sang Amerika nga isaylo ang kidney sang baboy sa isa ka tawo.
Ang pasyente amo si Rick Slayman, 62, residente sang Weymouth, Massachusetts, nga na-diagnose nga may end-stage kidney disease.
Makabig man ini nga kabahin na sang maragtas bangud ini ang labing-una nga tion nga wala napalpak ang pig kidney transplant sa isa ka buhi nga tawo — isa ka milestone sa patag sang xenotransplantation ukon ang animal-to-human transplant.
Ginsaad sang ospital nga nagpasugot ang pasyente sa amo nga transplant, bangud una, limitado na ang iya nga medical options kag ikaduha, gusto man sini nga makadala sang paglaum sa linibo ka mga pasyente nga posible mabuligan paagi sa sini nga procedure.
Sa pagkamatuod, indi ini ang una nga kidney transplant kay Slayman — sang 2018, nakabaton man siya sang kidney halin sa isa ka tawo bangud sa iya nga diabetes kag high blood pressure. Samtang nagadugay kag nag-lima na ka tuig, ang amo nga kidney ang nagpakita na sang sintomas nga nagahina na ini rason nga nagbalik ang pasyente sa dialysis sang 2023.
Kasunod naman sang iya pag-angkon sang kidney sang baboy, gin-report sang ospital nga nakalakat na ang pasyente sang 20-laps sa transplant unit sang ospital kag posible nga makaguwa na sa pasilidad sa masunod nga inadlaw.
Ang kaso ni Slayman amo ang ikatatlo nga xenotransplant kun sa diin gingamit ang organ sang baboy kag ginsaylo sa tawo.
Ang nauna nga duha ka procedure ang naggamit sang korason sang baboy apang pareho nga napatay ang pasyente pila ka semana matapos nga nabaton ang organs.
Nahibaluan nga kada adlaw, 17 ka mga tawo ang nagakapatay sa US samtang nga nagahulat sang organ kun sa diin ang pinakakinahanglanon amo ang kidney. Suno sa Organ Procurement and Transplantation Network, ginabanta 27,000 kidneys ang na-transplant sang 2023, apang malapit 89,000 ang yara sa waitlist para sa amo nga organs.
Ginapatihan naman sang mga eksperto nga ang xenotransplantation ukon transplants halin sa sapat pakadto sa tawo amo ang kritikal nga parte sang pagsolbar sa kakulangan sang donor organs.#
(Photo: Michelle Rose/Massachusetts General Hospital)
