Opisyal na nga ginkakas si Cavite 4th District Representative Kiko Barzaga bilang myembro sang Kamara subong nga gab-i, Hunyo 2.
Nagdangat sa 265 ang ka mga kongresista ang nagboto-pabor sa pag-expel kay Barzaga; 14 ang nagpamalabag; kag walo ang nag-abstain.
Ini ang kasunod sang rekomendasyon halin sa Committee on Ethics and Privileges matapos ginpahayag nga guilty si Barzaga sang disorderly behavior, conduct unbecoming, kag violations sang House Code of Conduct.
Matandaan nga nag-file sang reklamo si Deputy Speaker kag Iloilo 1st District Rep. Janette Garin nga nagaakusar kay Barzaga nga sulit-sulit nga nagasabad sa House proceedings, naga-engage sa discourteous conduct sa iban nga kongresista, kag nagagamit sang social media content nga suno sa komite nagapanubo sa dignidad kag integridad sang institusyon.
Sa konklusyon sang Ethics Committee, nalapas ni Barzaga ang Sections 141(a) kag (b) sang House Rules. Ginpahayag nga nagkabos man si Barzaga sa professionalism nga required sa idalom sang Republic Act (RA) 6713 ukon ang Code of Conduct and Ethical Standards for Public Officials and Employees.
“The Committee considers that another penalty of suspension will not likely deter the improper behavior, which continuously reflects negatively on the image of the House of Representatives,” suno sa committee report nga gin-sponsor ni 4PS Party-list Rep. JC M. Abalos .
“After deliberation on the case, the Committee found Rep. Francisco ‘Kiko’ A. Barzaga of the Fourth District of Cavite to have committed disorderly behavior and conduct unbecoming of a Member of the House of Representatives.”
Antes sini nga desisyon sang Kamara, duha ka beses na nga nadagdagan si Barzaga sang 60 ka adlaw nga suspensyon.
Nakaserbe anay si Barzaga bilang House assistant majority leader sa 20th Congress antes siya nangin vocal critic ni President Bongbong Marcos kag anay House Speaker Martin Romualdez.
Nag-resign siya sa National Unity Party sang September 2025 matapos na-link sa alleged plot agud nga kakason si Romualdez. Myembro subong si Barzaga sang Partido ng Demokratiko Pilipino (PDP) nga partido ni former president Rodrigo Duterte.
Ini nga 27-anyos nga kongresista ang nakaduso man sang anum ka mga hagna sa iya 11 ka bulan nga pagtinir sa Kongreso lakip na ang proposal nga himuon nga legal ang divorce sa Pilipinas. Nangin co-author man siya sang lima ka iban pa nga bills sandig sa iya nga congressional profile.#
