BAROTAC NUEVO, ILOILO-May yara na sang ginasundan nga anggulo ang otoridad sa pagluthang-patay sang riding-in-tandem suspects sa isa ka quarry operator sa Barotac Nuevo, Iloilo.
Ang biktima amo si Boy Almarsa, legal ang edad, residente sang Brgy.Lagubang,sa nasambit nga banwa.
Sa interview sang Bombo Radyo Iloilo kay Police Executive Master Sergeant Glen Fortunes, hepe sang Barotac Nuevo Municipal Police Station, iya ginpahayag nga base sa pahayag sang asawa sang biktima, may yara sang kakompetensiya sa quarry operation ang iya bana.
Suno kay Executive Master Sergeant Fortunes, ginpahayag sang asawa nga may yara sila sang kaso tuhoy sa ginaawayan nga road right of way sa diin natalana kuntani ang hearing subong nga adlaw.
Dugang pa ni Fortunes nga wala naman sang iban nga kontra ang biktima suno sa iya asawa.
Apang suno sa hepe, ila man ginasundan ang anggulo nga mahimo naangot sa iya kaso sadto nga illegal possession of firearms ang pagpatay sa biktima kag ginpahayag man nga asset man ini sang Criminal Investigation and Detection Group apang ini ang wala pa makumpirma.
