May isa ka kuring sa New Zealand nga bantog sa ila nga mga kasilingan bangud sang tumalagsahon sini nga abilidad.
Kun naandan naton nga nagapang-takab ang kuring sang sud-an, si Leo naman ukon ang kuring nga ginbansagan nga si Leonardo da Pinchy ang nanamian gid nga manghakot sang hinalay sang ila mga tupad-balay.
Suno kay Helen North nga tag-iya sang kuring, ang paborito gid nga kuhaon sang iya hinuptanan amo ang hinalay nga mga underwear kag ang mga medyas.
Pahayag sini, base lang sa iya naisip, 159 na ka mga bayo kag underwear ang nahakot sang iya kuring, kag kun kaisa, may dala man ini nga gardening gloves, sports bra, kalo, kag maski malahalon nga jersey nga may price tag pa.
Suno kay Helen, pinaka-aktibo si Leo kada Domingo kun sa diin madamo ang hinalay nga bayo sa ila palibot.
Agud mabalik ang mga gamit sa tag-iya, ginagamit naman ni Helen ang isa ka lokal nga WhatsApp group kag mga Facebook group sang ila kasilingan.
Didto niya ginapost ang mga litrato sang mga bagay nga ginadala ni Leo agud makita kag makuha sang tag-iya.
Gindugang man sini nga wala man ginaguba ni Leo ang mga gamit, kundi ginabilin lang sa salog nga daw kaangay nga wala lang sang natabo.
