ANTIQUE – Ginkumpirma sang Antique Provincial Government ang labing una nga kaso sang Coronavirus Disease 2019 (COVID-19) sa Antique.
Sa interview sang Bombo Radyo kay Antique Governor Rhodora Cadiao, iya ginpahayag ang ang labing una nga COVID-19 patient sa nasambit nga probinsya amo ang 74 anyos nga lalaki kag isa ka engineer, kasado kag tumandok sang Parañaque City, Metro Manila.
Suno kay Cadiao, nasambit nga pasyente ang nag-abot sa Brgy. Semirara, Semirara Island sa Caluya sang Marso 9 sakay sa private plane kag nagpakunsulta sa Semirara Mining Power Corporation Hospital sang Marso 19 matapos nakabatyag sang hilanat kag kabudlay sa pagginhawa.
Sang Abril 2, ginpaidalom sa test ang specimen kag nakumpirma nga positibo ang pasyente sa SARS-COV-2 nga isa ka causative agent sang COVID-19.
Sa subong suno kay Cadiao, yara na sa estable nga kondisyon ang pasyente kag ginapaidalom sa strict home quarantine samtang padayon naman ang contact tracing.
