Daw maano gid kita kun indi kita makapauli sa aton nga mga balay.
Siling nila, there is no place like home, kag amo man ini ang pinaka-safe nga lugar subong nga may pandemya.
Baliskad ini sa natabo sa isa ka lalaki sa Estados Unidos kun sa diin tatlo ka bulan siya nga nagtinir sa isa ka secure area sa international airport sang Chicago bangud sang iya kahadlok nga magbyahe pauli sa ila nga balay California.
Ang lalaki amo si Aditya Singh, 36.
Gin-aresto siya sang damlag lang bangud wala siya sang mapakita nga ID sang ginpangitaan siya sang isa ka airline staff.
Sa pagpangusisa sang mga pulis, Oktubre 9 pa sang nagligad nga tuig sang nag-abot si Mr. Singh sa airport apang ginapahayag nga nakulbaan siya magpauli bangud sang COVID-19.
Sang ginpamangkot kun paano siya nabuhi sa sulod sang tatlo ka bulan, nagpanugid si Mr. Singh nga may mga maalwan man nga tawo sa airport nga naghatag sang pagkaon sa iya.
Wala sang criminal backround si Mr. Singh sa ila lugar sa Los Angeles apang bangud sang iya pagtinir sa airport, napasakaan siya sang kaso nga felony criminal trespass kag misdemeanour theft.
