ILOILO CITY- May isa ka lalaki sa pungsod Algeria nga nadula sa ila balay isa ka aga sang 1998.
Kag sang damlag lang, matapos ang 27 ka tuig, ini ang nakit-an nga buhi…sa isa ka hulot sa ila man lang tupadbalay.
Ini ang istorya sang 17 -anyos palang sadto nga si Omar bin Omran nga nadula sa ila balay sa Djelfa, Algeria, sang 1998 nga panahon sang Algerian Civil War.
Sang amo nga tion, gindumdom sang iya pamilya nga isa ini sa 200,000 ka tawo nga napatay ukon nalakip sa 20,000 nga gin-kidnap sa amo nga kinagamo.
Wala na sang iban nga nagpadayon sa pagpangita sa iya kundi ang iya iloy apang nagtaliwan ini sang 2013 kag gindumdom sang mga tawo nga isa ang kaso ni Omar bin Omran nga indi gid masolbar.
Apang sang damlag lang, isa ka lalaki ang nanugid nga may yara sang tawo nga ginatago sa balay sang iya utod sa isa ka sekreto nga hulot kag ini nga lalaki ang ginkidnap pila ka dekada na ang nagligad.
Didto na nagsugod ang operasyon sang pulis agud lantawon kun sin-o ang gintago nga lalaki.
Kag, ang amo nga lalaki wala sang iban kundi si Omar bin Omran, nga yara na edad sa masobra 40, kag ang iya stwasyon, may yara ini sang physical kag mental problems.
Gindakop naman ang tag-iya sang balay kag padayon nga ginaimbestigaran.
Suno naman kay Omran, may mga tion man nga makit-an niya sa gwa sang amo nga hulot nga nagalabay ang iya pamilya apang indi ini makahambal agud mangayo sang tabang bangud kaangay nga yara ini sa idalom sang gahum sang mahika sang tawo nga nagkidnap sa iya rason nga gin-antos sini ang amo nga sitwasyon sa sulod sang malapit tatlo ka dekada.
