Kadamo sang mga tawo nga gusto makahimo sang world record. Daw sa ano bala nga ikaw gid ang pinakasagad, ukon ang ginakilala nga pinakamaayo, sa isa ka bagay?
Sa Nigeria, pinasahi pa gid ang napinsaran sang isa ka lalaki agud maka-set sang record — ini amo ang sige-sige nga paghibi sa sulod sang 100 ka oras!
Ang lalaki amo si Tembu Daniel nga may bansag nga towncryer.
Sang damlag lang, gin-umpisahan ni Tembu ang iya nga crying marathon apang ginsuspinde man niya makaligad ang anum ka oras bangud sa side effects.
Suno kay Tembu, nakabatyag siya sang tuman ka sakit nga ulo, nagahabok ang iya mata pati ang iya nawong, kag ang pinaka-malala pa, temporaryo nga nadula ang iya panan-awan sa sulod sang 45 minutos.
Bangud sa partial nga pagkabulag, gin-islan niya ang iya nga estratehiya paagi sa paghibi samtang nagakaon kag pagpamati sa masubo nga background music.
Indi man maathag kun nalab-ot sini ang iya 100 ka oras nga target nga crying marathon.
Ginpasa man sang nasambit nga African ‘town crier’ ang iya nga record attempt sa Guinness World Records.
Nag-react naman ang Guinness kag nagsiling nga indi sila mag-monitor sa amo nga sahi nga attempt, kag may yara man sang gin-share nga guidelines kun ano dapat ang sundon kun maghimo sang world record.
