ILOILO CITY – Diri sa Pilipinas, naandan naton nga mga matahom nga bulak ukon flower-bearing small trees ang ginatanom sa mga center islands.
Apang sa Japan, puno sang saging ang gintanum sang isa ka 50-anyos nga lalaki.
Sa Kurume City sa Fukuoka Prefecture, ginmanduan ang wala ginhingadlan nga lalaki nga kuhaon ang tatlo ka puno sang saging nga iligal niya nga gintanom kag ginsagud sa center island sa isa ka busy city road sa sulod na sang duha ka tuig.
Indi pa klaro kun ngaa nga ginpili sang lalaki nga magtanom sang saging sa public property kag sa kadamuon sang lugar, sa center island pa.
Ini ang naga-apekto na sa view sang mga motorista.
Wala na nabudlayan pa ang mga otoridad sa pagtumod sa lalaki bangud duha ka beses sa isa ka adlaw ang pagbunyag niya sa saging.
Ginmanduan siya nga gabuton ang saging bangud nga kun indi, presuhon ini kag multahan sang 500,000-yen ukon masobra sa P180, 000.
Ginkasubo naman sang lalaki ang paggabot sa iya gintawag nga “beautiful bananas.”
Ang duha sa tatlo ka mga puno sang saging nga gingabot ang gintanom sa garden sang isa ka 80-anyos nga lalaki nga nagpasalig nga halungan ini samtang ang isa naman ang ginhatag sa abyan sang tag-iya bilang birthday present.
