ILOILO CITY–Gina amat-amat na sang kampo ni Iloilo City Mayor Jose Espinosa III nga ginatabunan ang laragway sang alkalde sa mga tarpaulin sa diin nakasaad ang campaign advocacy ni Presidente Rodrigo Duterte tuhoy sa pagtapna sang illegal drugs, kriminalidad kag kurapsyon.
Sa nasambit nga tarpaulin, makita ang laragway nanday Espinosa kag Duterte nga naka ‘fist sign’ kag nakasaad ang mga tinaga nga: ‘Utos ni Presidente, Utos ni Mayor, No to illegal drugs, No to Criminality kag No to Corruption.
Ini matapos nga ginpadal-an sang Commission on Elections (COMELEC) sang sulat si Mayor Espinosa bangud sa paglapas sa Omnibus Election Code.
Sa interview sang Bombo Radyo kay Mr. Jonathan Sayno, election officer 2 sang City COMELEC, iya ginpahayag nga wala man nagpamalabag si Mayor Espinosa sang mahibalu-an nga may paglapas sa Omnibus Election Code ang nasambit nga tarpaulin.
Ini bangud nga suno kay Sayno, ang nasambit nga campaign advocacy ang iya ni Presidente Duterte kag indi dapat paggamiton sang mga nagakandidato sa eleksyon.
Bangud nga nanugunan man si Mayor Espinosa nga pangkakson ang mga tarpaulin, iya ginpromisa nga tabunan na lang ang iya laragway kag ang makita na lang amo ang dagway ni Presidente Duterte.
