Ginpabugal sang North Korea ang kadamuon sang ila nuclear missiles lakip na ang isa ka ginapahayag bag-o nga solid-fueled intercontinental ballistic missile.
Ang solid-fueled missile suno sa analysts ang nagakahulugan nga wala na ini nagakinahanglan sang liquid fuel gani mas mahapos ini nga paluparon kag mas mabudlay nga makit-an kag masagang sang mga kasumpong. Indi ini kaangay sang ballistic missiles nga nagagamit sang liquid fuel ukon ginabutangan pa sang propellant nga mas madugay pa antes ipalupad halin sa launch site.
Ginparada ini ni North Korean president Kim Jong Un kadungan sang ika-75 nga anibersaryo sang armed forces sang pungsod.
Kaupod ni Kim ang iya asawa kag ang iya anak nga babayi sang ginpatigayon ang parada.
Ginapahayag nga ini nga parada ang nagapakita sang pinakamabaskog nga nuclear attack capability sang amo nga pungsod kag naga-tiglawas sang isa ka daku nga pagpanghangkat sa Estados Unidos sang Amerika.##
