ILOILO CITY- Padayon pa ang imbestigasyon sang otoridad may kaangtanan sa natabo nga paghold-up sa isa ka member sang LGBTQ Community sang nakigkita ini sa iya menor de edad nga chatmate sa Brgy. San Juan, Molo, Iloilo City.
Sa interview sang Bombo Radyo kay Salvador Tabor, barangay tanod sa lugar, iya ginpahayag nga base sa panaysayon sang biktima nga si alyas Pinky, 23-anyos kag residente sang Boulevard, Molo, nagkitaay sila sang 17-anyos nga chatmate sa sulod sang covered gym.
Suno kay Tabor, naggwa ang menor de edad agud magbakal sa tiangge kag samtang nagahulat si alyas Pinky, may apat ka mga lalaki nga nagpalapit sa iya kag nagdeklarar sang hold-up.
Ginkuha sang mga lalaki ang cellphone sang biktima kag sang gintuyo pa gid nila nga kuhaon ang iya kahita, nagbato ini gani nasumbagan ini sa kilid sang guya apang nabawi niya ang iya kahita nga may unod nga kwarta.
Gilayon naman nga nagpalagyo ang mga suspek kag makatilingala man nga wala na nagbalik sa covered gym ang menor de edad kag posible, suno sa biktima, nga kahimbon ini sang mga suspek.
