Gina-reklamo ang isa ka istilo sang marketing sa probinsya sang Guimaras kun sa diin ginatanyagan sang libre nga detergent powder ang mga motorista nga nagalabay sa dalan apang ang makalilibog, may ginasukot man nga bayad!
Sa interview sang Bombo Radyo kay Lynn nga isa sa natanyagan sang libre nga habon sa amo nga probinsya, iya ginpahayag nga kun maparahan na ang motorista, ginapangayuan sila sang identification card para malista kag makakuha sang libre apang kinahanglan gihapon magbakal sang produkto.
May impormasyon nga yara sa P399-P400 plus ang presyo sang habon.
Suno kay Lynn, wala man sang problema nga mag-promote kuntani sang produkto apang ‘patalang’ na ang style nga ini kag huol sa tyempo sang mga motorista.
“Wala gid problema bala mag-promote products pero ang inyo bala style patalang! Parahan ninyo mga motorista kag mag-offer free nga detergent powder, ma-ask ID. Pro ako ya segurista gid, ginpamangkot ko sure ka nga free? Or need magbakal!?,” kabahin sang post sini.
“Baw sinabat ya ko nga wala na free subong! Pero ginpara ako para gaan yako free kuno ako man ya ginbaton ko gali kay need mo gid magbakal! Insaktuha man marketing strategy ninyo nga indi kamo da ka perwisyo sa dalan! Pang-gulat pa style nyo! Location nila Alibjon subong nagapang-para motorista!,” pahayag sini.
Pahayag ni Lynn, may mga kakilala siya nga na-intuan gid mismo bangud nagapang-paryente pa ang nagatanyag sang habon tubtub nga ma-engganyo nila ang motorista nga magbakal sang habon nga tuman ka mahal.
Naka-abot naman sa Jordan Municipal Police Station ang amo nga reklamo.
Sa interview sang Bombo Radyo kay Police Captain Ma. Jona Casono, hepe sang Jordan Municipal Police Station, iya ginpahayag nga base sa ila nga imbestigasyon, may napakita man ang grupo nga sertipiko halin sa Department of Trade and Industry (DTI).
Suno kay Casono, halin pa sa Caloocan ang lider sang 16 ka mga indibidwal nga amo ang naga-conduct sang amo nga buluhaton.
Magluwas diri, may na-presentar man sila nga request letter halin sa punong barangay nga nagapahanugot sa ila nga mag-promote sang ila produkto sa San Miguel, Jordan.#
