Ginkumpirma ni Belarusian President Alexander Lukashenko nga yara sa St. Petersburg sa Russia kag wala sa Belarus si Yevgeny Prigozhin, ang lider sang private mercenary group nga Wagner.
Suno kay Lukashenko, wala man sang gintukod nga base ang Wagner sa Belarus apisar pa sang tanyag sang Kremlin para sa mga nag-intra anay sa mutiny.
Suno pa sa presidente, yara ang mga tinawo sang grupo sa ila permanent camp sa Molkino sa southern Russia.
Kadungan sini nga statement, ginpahayag man sang Belarusian leader nga indi pag-ipapatay ni Russian President Vladimir Putin si Prigozhin.
Matandaan nga sang nagpatigayon ang Wagner sang rebellion sa Russia, si Lukashenko nga kaalyado ni Putin amo ang nagbulig sa pag-negosyar tubtub nga wala nadayon ang pagsulong sa Moscow. Ginkumpirma man sini anay nga nag-abot si Prigozhin sa Belarus pagkatapos sang nakasugtan sa negosasyon.
Sa panibag-o nga statement, ginpahayag ni Lukashenko nga yara gihapon ang offer nga maka-station ang Wagner sang ila nga mga hangaway sa Belarus kag nagatanyag man siya sang Soviet-era military sites agud ila nga magamit.
Ini nga tanyag ang nag-alarma sa mga kaiping nga pungsod nga sakop naman sang North Atlantic Treaty Organization ukon NATO.
Wala naman sang kumpirmasyon nagikan sa Kremlin kun sa diin nagkadto kag kun diin subong ang lider sang Wagner.
Hunyo 23 sang naglunsar si Prigozhin sang rebelyon batok sa military leadership sang Russia kag nagpadala sang mga tinawo pakadto sa kapital nga Moscow nga amo ang ginlantaw pinakadaku nga pagpanghangkat sa rehimen ni Putin sa Russia. #
