Lima na ka mga tawo ang kumpirmado nga patay kag masobra 70 ang nasamaran bangud sang 7.5 magnitude nga linog nga nagtay-og sa Japan.
Suno kay Prime Minister Fumio Kishida, natipon sang local authorities ini nga data Martes sang kaagahon apang wala pa subong na-consolidate ang tanan nga impormasyon bangud natabo ang linog pasado ‘las kuatro kahapon sang hapon oras sa Japan.
Nagbakwit man ang linibo ka mga tawo kag nagtinir sa evacuation centers kasunod sang tsunami warning nga ginpaguwa kasunod sang mabaskog nga linog.Ini nga warning ang ginkanselar sa coastal regions sang western Japan apang nagpabilin ang advisories kag gin-abisuhan gihapon ang mga residente nga magbiya anay sa ila nga balay.
Sa western coast sang pungsod, nagalab-ot sa 1.2 metros ang kataason sang tsunami waves.
May na-report naman nga nagkalahalitan nga mga dalan kag building, naatrasar ang serbisyo sa transport kag komunikasyon, kag nagpaandam man ang mga opisyal sang dugang nga pagkadula sang suplay sang kuryente sa linibo ka mga puluy-an.
May na-record na nga aftershocks — butang nga ginsiling sang weather agency nga posible magpadayon tubtub sa masunod nga inadlaw.#
