ILOILO – Ginkalipay sang Iloilo Provincial Government ang nangin madinalag-on nga paglunsyar sang ‘Limpyo Iloilo’, ang flagship program sang Solid Waste Management sa bug-os nga probinsya.
Suno kay Governor Arthur Defensor Jr., lauman nga magapadayon ang kampanya sa pagpanglimpyo kag panugod gid lamang ang ginhimo nga ceremonial launching sang nasambit nga programa sa banwa sang Sta. Barbara sang Biyernes, Pebrero 21.
Dugang pa ni Defensor, madamo pa nga mga aktibidad ang padayon nga ginaplanuhan agud mangin aktibo ang Limpyo Iloilo sa nanuhay-tuhay nga kabanwahanan sa probinsya.
Mas maayo suno sa opisyal kun ikampanya ini sang mga opisyal sa local government unit kaangay sang ila pagpangampanya sa eleksyon.
Nahibaluan nga ang nasambit nga convergence clean-up ang ginpakigbahinan sang Department of Education, Department of Environment and Natural Resources, Department of Interior and Local Government, Department of Public Works and Highways, mga non-government organizations, people’s organizations kag Local Government Unit.
Kaangot diri, ginaduso man sang gobernador nga i-regulate ang paggamit sang single-use plastic ukon cellophane sa mga merkado kag iban pa nga establishemento-komersyal sa probinsya sang Iloilo.
Plano ni Defensor nga tawgon ang programa nga Balik Basket ukon Balik Alat.
Suno kay Defensor, umpisahan ang nasambit nga programa sa Iloilo Provincial Capitol.
