Sa baylo nga mag-enjoy sa ila nga bakasyon, nagtalal-as ang linibo ka mga turista sa Rhodes Island sa Greece bangud sa wildfire.
Ang isla sang Rhodes amo ang isa sa pinakabantog nga kaladtuan sang mga turista sa Greece kun sa diin masami nagatinir ang British, German kag French tourists.
Apang bangud sa wildfire sa sulod na sang anum ka adlaw, napilitan nga mag-evacuate ang ginabanta 30,000 ka mga turista.
Ang iban sa mga bisita ang nagatiniil lamang sang ginmanduan nga magbiya bangud sa paglapta sang kalayo sa central kag southern part sang Rhodes.
Ginsaylo ang mga turista sa mga eskwelahan, indoor stadiums, hotels, kag conference centers. Suno sa fire officials, may walo man ka mga tawo nga ginpangdala sa ospital bangud sa hapo. Ginkansela naman sang British airline nga Jet2 ang flights kag holiday offers sa amo nga isla.
Ginlaragway sang gobyerno nga pinakadaku nga numero sang evacuees ang natabo sa pagtal-as sang mga turista.
Sandig sa rekord sang Greek Ministry of Civil Protection, 13 ka departments lakip ang Attica region kun sa diin nahamtang ang capital city nga Athens ang napaidalom sa red alert sa wildfires nga amo ang pinakataas nga alarm nga ginapapanaog kun may yara sang extreme risk sang sunog.#
