ILOILO – Nagapamatok ang League of the Municipalities of the Philippines – Iloilo Chapter sa pagpauli sang mga Overseas Filipino Workers sa Iloilo.
Ini ang may kaangtanan sa sulat nga ginpadala kay Captain Jim Syndionco, Director General sang Civil Aviation Auhtority tuhoy sa ginaduso sang mga alkalde sa probinsya sang Iloilo.
Sa interview sang Bombo Radyo kay San Enrique Mayor Trixie Fernandez, Presidente sang League of the Municipalities of the Philippines – Iloilo Chapter, iya ginpahayag nga kalabanan sa mga alkalde ang nagpasugot nga ipaiway anay ang flight sang mga magapauli nga Overseas Filipino Workers.
Suno kay Fernandez, bisan si Gov. Arthur Defensor Jr., ang nagpabor man sa nasambit nga lihok agud nga indi na madugangan ang numero sang mga pasyente nga nagpositibo sa Coronavirus Disease 2019 (COVID-19).
Ginpahayag ni Fernandez nga kaayuhan lamang sang kadam-an ang ila prayoridad ilabi na nga amat-amat na nga nagabuhin ang numero sang Persons Under Monitoring kag Persons Under Investigation.
Nahibalu-an nga indi na madayon ang pagpauli sang 150 ka Overseas Filipino Workers nga sakay kun tani sa Manila-Iloilo flight sang Philippine Airlines.
Ang flight sang OFWs ang natalana subong nga adlaw, Abril 14, kun sa diin unahon anay sa pagpauli ang mga sakay sang masunod nga flight nga nakatapos na sa 14 ka adlaw nga quarantine.
Antes makapauli, kinahanglan anay nga ipaidalom sa COVID-19 test ang mga Overseas Filipino Workers kag ipaidalom liwat sa confirmatory test pag-abot sa Iloilo.
Magluwas diri, ipaidalom man 14 ka adlaw nga quarantine sa John B. Lacson Foundation Maritime University – Arevalo ang mga Overseas Filipino Workers antes makapauli sa ila tagsa ka balay.
