Magapasa sang request ang mga local chief executives sang Western Visayas sa National Inter-Agency Task Force agud hingyuon nga i-require ang negative reverse transcription polymerase chain reaction (RT-PCR) test result para sa mga byahero nga magasulod sa Rehiyon VI.
Ini ang nahisugtan sa virtual nga pagsinapol nga gintambungan sang mga gobernador sa mga probinsya kag alkalde sa highly-urbanized cities sang Western Visayas magluwas lang sa probinsya sang Antique nga wala nakatigayon nga maka-attend.
Ang amo nga request ang magacover pati na sa returning residents kag sa mga Authorized Persons Outside Residence ukon APOR.
Sa interview sang Bombo Radyo kay Ma. Aletha Nogra, spokesperson sang Regional Taskforce for COVID-19, iya ginpahayag nga ginkonsiderar sang mga local chief executives ang nagatimbuok nga kaso sang COVID-19 sa iban nga mga lugar ilabi na sa National Capital Region (NCR).
Ang negative RT-PCR test result ang kinahanglan i-secure within 72 hours antes ang petsa sang byahe.
Kun indi pag-aprubahan sang National IATF ang amo nga request, ipatuman ang IATF Resolution 101 kun sa diin travel requirements gihapon para sa mga APOR ang pagpresentar sang ID, travel order, kag travel itinerary.
Kinahanglan man pasaron sang APOR ang symptom-screening sa entry and exit.
Para sa returning residents kag local tourists, kinahanglanon ang negative RT-PCR test result within 72 hours antes ang byahe kag kinahanglan man nga gamiton ang Safe, Swift, and Smart Passage (S-PaSS) Travel Management System.
Ang S-Pass System amo ang one-stop shop application kag communication platform para sa travelers kag magaserbe nga primary contact tracing system.
Wala na sang travel authority kag health certificates nga kinahanglanon.
Mangin istrikto man ang health screening sa ports and terminals.
Kun may yara na sang negative RT-PCR test result ang byahero, indi na kinahanglan nga magpaidalom liwat sa swab test pag-abot sa Rehiyon VI kag indi naman kinahanglan ang mandatory quarantine.
Para sa mga byahero nga makitaan sang sintomas sang coronavirus, isaylo sila sa quarantine isolation facilities.
