Makahalawat-hawat ini nga adlaw para sa mga Pinoy ilabi na para sa mga nagahulat nga madugangan pa ang medalya sang Pilipinas halin sa Olimpyada.
Tatlo ang balantayan nga hampang subong nga adlaw:
- 10:15 subong nga aga, Quarterfinals sang Men’s Flyweight kun sa diin kasumpong ni Carlo Paalam si Shakhobidin Zoirov sang Uzbekistan
Kun mapierde ni Paalam si Zoirov, sigurado na ang isa pa ka bronze medal para sa Pilipinas.
- 6:20 karon sa gab-i, finals na sang Men’s Pole Vault kun sa diin magahampang man si Ernest John ‘EJ’ Obiena kag nagalaum man nga madala pauli ang gold medal.
- 12:05 karon sa udto, atubangon na ni Nesthy Petecio sa Women’s Featherweight Finals ukon sa gold medal match ang iya daan nga kasumpong nga si Sena Irie sang Japan
Pamilyar na si Petecio kay Sena bangud napierde na niya ini via Split Decision, 4-1, sang Quarterfinals sang 2019 AIBA World Championships sa Women’s Featherweight Division.
Sang 2020 Asian Olympic Qualification, si Sena naman ang nagpierde kay Petecio.
May tyansa na subong si Petecio nga sundon ang tapak sang weightlifter nga si Hidilyn Diaz nga amo ang una nga atleta nakasecure sang gold medal para sa Pilipinas.
Ang sigurado subong amo ang silver medal para kay Petecio APANG KUN madaug niya ang hampang batok sa host country nga Japan, siya ang first female boxer nga makakuha sang Olympic Gold medal para sa Pilipinas.
