Natalana nga sapulon sang matag-as nga opisyal sang COVID-19 response team sang Pilipinas si contact tracing czar Benjamin Magalong agud kumbinsihon siya nga bawion ang iya resignation bilang COVID-19 tracing czar sang pungsod.
Matandaan nga nangin kontrobersyal si Magalong matapos nakit-an nga nagtambong sang isa ka party sa Baguio City kun sa diin wala nasunod ang mga health protocols batok sa COVID-19.
Kasunod sini, nagpasa si Magalong sang resignation letter.
Suno naman kay COVID-19 vaccine czar Carlito Galvez, Jr., “irreplaceable” ukon wala sang may makabulos kay Magalong bilang contact tracing czar sang Pilipinas.
Suno pa kay Galvez, indi pa gihapon nila mabaton nga buy-an ni Magalong ang iya nga posisyon.
Magluwas nga isa ka contact tracing czar, alkalde man sang Baguio City si Magalong kag key player man sa pagtapna sang new COVID-19 variant sa Cordillera region.
Sigurado gid suno kay Galvez nga tuman ka budlay ang agyan sang sin-o man nga tawo nga pabuslon kay Magalong sa iya nga posisyon.
Suno naman kay Vince Dizon, head sang COVID-19 testing program sang pungsod, magasapol sila ni Galvez kag Magalong agud piliton siya nga magpabilin sa Inter Agency Task Force against COVID-19.
Matandaan nga una naman nagpahayag si Magalong nga posible maglain pa ang iya nga desisyon kun si Presidente Rodrigo Duterte ang mahingyo sa iya nga magpabilin siya bilang COVID-19 tracing czar.
Suno naman kay Presidential spokesperson Harry Roque, wala na siya sang iban nga mga nabatian gikan kay Duterte kundi pagdayaw para kay Magalong.
