Wala pa sang nakita nga peligro ang Malacañang sang “energy lockdown” ukon kakulangan sang suplay sang kuryente kag langis sa pungsod apisar sa naga-lala nga kinagamo sa Middle East.
Suno kay Palace Press Officer Undersecretary Claire Castro, sa subong nga tion malayo pa ang pungsod sa sitwasyon pareho sang dekada ’70 nga may fuel rationing kag wala sang mga salakyan.
Dugang pa sang opisyal, bilang kabahin sang contingency plan sang administrasyon ni President Ferdinand Marcos Jr., aktibo nga nagapangita ang Department of Energy kag Department of Foreign Affairs sang alternatibo nga kuhaan sang produktong petrolyo nga wala naga-salig sa Middle East.
Ginmensyonar man ni Castro ang report ni Energy Secretary Sharon Garin nga sa subong naga-pakig-angot na ang Pilipinas sa mga pungsod kaangay sang India, Argentina, kag Canada agud masiguro ang padayon nga suplay sang langis sa pungsod.
Dugang pa ni Castro, samtang nagalaom ang gobyerno sa diplomatiko nga resolusyon sa tunga sang mga nagakinagamo nga pungsod, padayon man ang pagpanghanda sang Presidente agud malikawan ang pinakamalala nga sitwasyon nga mahimo magpabudlay sa mga Pilipino.
