Nagpasalig ang Malacañang nga himuon ang tanan agud mahatagan sang hustisya ang kamatayon sang isa ka Filipino migrant worker sa United Arab Emirates.
Ang biktima amo si Mary Anne Daynolo, isa ka hotel receptionist sa Abu Dhabi, gin-report nga missing sang nagligad nga Marso 2020 apang subong lang nga Enero nasapwan nga patay.
Suno kay Presidential Spokesperson Atty.Harry Roque, nagpromisa si Presidente Rodrigo Duterte nga magluwas sa paghatag sang hustiya para kay Daynolo, hatagan man sang dugang nga edukasyon ang iban nga mga Pinoy agud mahibaluan nila ang himuon kun ara na sa luwas sang pungsod.
Gindul-ong na diri sa Pilipinas ang bangkay ni Daynolo sang nagligad nga weekend.
Nagpasalig man si Roque nga gobyerno ang magabayad sa lubong ni Daynolo kag hatagan man sang ayuda ang pamilya sang napatay.
Una na nagpahayag si Labor Secretary Silvestre Bello III nga yara na sa “advanced stage of decomposition” ang bangkay ni Daynolo sang nasapwan siya sang nagligad nga bulan.
Suno kay Belo, gin-aresto man sang mga pulis sa Abu Dhabi ang suspek nga amo ang Ugandan national nga si certain ‘Paul’ nga nag-ako nga siya ang nagpatay kay Daynolo.
Ginpahayag nga ginbawian sang kabuhi si Daynolo matapos nga ginbuno siya sang suspek sa liog gamit ang kutsilyo.
Ginapangita pa subong sang otoridad ang duha pa ka tawo nga nagbulig sa suspek sa paglubong sang amo nga Pinay.
