Arestado ang ginatudlo nga source sang mga nauna nga nadakpan nga drug suspects sa buybust operation sa distrito sang Jaro subong lamang nga gab-i sa Brgy. Cuartero, Jaro, Iloilo City.

Ginkilala ang arestado kay alyas “Peter”, 34-anyos, isa ka panday kag residente sang nasambit nga lugar.

Sa interview sang Bombo Radyo kay Police Captain Roque Gimeno III, officer in charge sang Iloilo City Drug Enforcement Unit, iya ginpahayag nga isa ka sachet sang ginasuspetsahan nga shabu ang nabakal sa operasyon kag 7 pa gid ka mga sachet ang na-recover sa arestado.

Sa kabug-usan, may yara sang 8 ka sachet ang nakumpiskar nga may kabug-aton nga ginabulubanta masobra 120 gramos kag may standard drug price nga ₱816,000.00.

Suno kay PCapt. Gimeno nga sa ila pag-imbestiga sa arestado ginpahayag sang mga nakakilala sini sa iya nga mapisan kag mabuot ini siya apang iya ginsulod ang pagnegosyo nga pagbaligya sang illegal nga droga.

Dugang pa ni PCapt. Gimeno nga wala ka balo ang iya pamilya sini sa iya illegal nga ginahimu.

Sa subong, yara na sa kustodiya sang ICPS 9 ang mga nadakpan nga arestado kag posible magapangatubang sang kaso nga pagpalapas sa Republic Act 9165 ukon Comprehensive Dangerous Drugs Act of 2002.

By: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂