ILOILO CITY – Plano sang Iloilo City Veterinary Office nga mangin mandatory ang pag rehistro sa mga hinuptanan nga ido may kaangtanan sa nagadamo nga mga stray dogs nga yara sa palibot sang syudad.
Sa interview sang Bombo Radyo kay Dr. Tomas Forteza, city veterinarian, iya ginpahayag nga win-win solution na lamang himuon sang city government bangud madamo sang mga nagapakamalaot sa euthanasia nga kuntani himuon sa mga layaw nga ido.
Suno kay Forteza, resposibilidad sang tag-iya ang mga ido sa diin nagakadapat nga irehistro ini kag mangin subject para sa anti-rabies vaccination.
Katuyuan sang mandatory registration sa mga ido amo nga makilala ang tag-iya bangud kun kaisa sa tion nga may tawo nga makadat sang ido, wala na sang may naga-ako sa ido kag husto na lamang nga mag hipos-hipos ang tag-iya.
Pahayag ni Dr. Forteza, plano man sang Iloilo City Veterinary Office nga butangan sang microchip ang mga ido.
Nka-istoryahanay naman si Forteza kag si Iloilo City Councilor Jay Treñas kag iya nakasugtan nga ma-coordinate siya sa pag-implemetar sang ordinansa sang konsehal.
Magalibot man ang City Veterinary Office sa tanan nga mga barangay sa syudad kag i-require nga may yara sang impounding facility ang lugar.
Kinahanglan nga magakooperar man ang mga barangay sa city government agud nga matigayon nga matipon ang mga layaw nga ido.
Sa tion nga wala gid sang may magkuha sa mga ido nga yara sa impounding facility sa barangay, i-turn over ini gilayon sa city veterinary office kag mangin “open for adoption”.
