Magabyahe subong nga adlaw, Hulyo 14, si President Ferdinand “Bongbong” Marcos Jr. padulong sa Singapore para sa tatlo ka adlaw nga working visit nga magalawig tubtub sa Hulyo 16.
Suno kay Palace Press Officer Claire Castro, ginalauman nga maga-courtesy call si Marcos kay Singapore Prime Minister Lawrence Wong kadungan sang iya nga pagbisita.
Lakip sa posible nga ila maistoryahan suno sa Malacañang amo ang mga paagi agud nga mapabakod pa ang kooperasyon sang duha ka pungsod sa trade kag sa investment, ikaayong-lawas, regional, kag global development.
Yara man sa iya nga agenda ang pagpakigsapol sa mga business leaders sa private roundtable discussion nga gin-organisar sang multi-national think tank nga Milken Institute kasunod sang reclassification sang World Bank sa Pilipinas bilang upper-middle-income country.
Ginapaabot man nga magahatag sang mensahe si First lady Liza Araneta-Marcos sa Global Economic Cooperation East Summit.
Suno kay Castro, gin-imbitar sang Future Economic Cooperation Council ang First Lady. Ini isa ka platform kun sa diin nagatipon ang business, government, kag policy leaders.
Ini nga working visit sang president ang matabo samtang padayon ang preparasyon sang pungsod para sa ASEAN chairmanship nga ipasa sa Singapore sa masunod nga tuig.
Sang nagligad nga semana, didto man sa Canada si Marcos kun sa diin na-secure suno sa Malacañang ang $2.5 billion nga investments halin sa Canadian business partners.
