Nakaabot na si President Ferdinand “Bongbong” Marcos, Jr. kag ang bug-os nga delegasyon sang Pilipinas sa Melbourne, Australia agud magtambong sa Association of Southeast Asian Nations (ASEAN)-Australia Special Summit.
4:15 sa hapon oras sa Pilipinas (7:15 sa gab-i oras sa Australia) sang naghugpa ang presidential plane sa Melbourne airport.
Kaupod si First Lady Louise “Liza” Araneta-Marcos, gin-abi-abi si Marcos ni Australian Assistant Minister for Foreign Affairs Tim Watts, Australian Ambassador to the Philippines HK Yu, ASEAN lead liaison officer Amy Eldridge, kag iban pa nga mga opisyal sa amo nga pungsod.
Sa iya nga departure speech kaina sang aga, ginsiling ni Marcos nga magapartisipar siya sa amo nga special summit matapos nakabaton sang imbitasyon halin mismo kay Australian Prime Minister Anthony Albanese.
Pila ka adlaw lamang ang nagligad, matandaan nga yara man si Marcos sa Canberra, Australia para sa duha ka adlaw nga state visit kun sa diin naghimo man ini sang maragtas bilang labing-una nga Filipino president nga nakahambal sa atubang sang Australian Parliament House.
Sa sini nga special summit, magluwas sa Pilipinas, yara ang Indonesia, Brunei Darussalam, Cambodia, Singapore, Thailand, Lao PDR, Malaysia, Myanmar, kag ang Vietnam; samtang ang Timor-Leste naman amo ang official ASEAN observer.
Lakip sa ginalauman nga himuon ni Marcos amo ang pagpasalamat sa Australia sa suporta sa 1982 United Nations Convention on the Law of the Sea kag sa 2016 ruling sang Permanent Court of Arbitration nga amo ang nagpabakod sang maritime entitlements sang Pilipinas kag naga-imbalido sang pag-claim sang China sa daku nga bahin sa West Philippine Sea.
Suno pa kay Foreign Affairs Assistant Secretary for ASEAN Affairs Daniel Espiritu, mahimo man nga i-highlight sang presidente ang kooperasyon sang Australia kag Southeast Asia sa maritime issues, climate kag clean energy track, people-to-people exchange, kag iban pa kadungan sa plenaryo.
May bilateral meetings man si Marcos sa mga lider sang Cambodia kag New Zealand, kag magapakigkita man ini sa Filipino community kag business leaders sa Melbourne.#
