Nagpanawagan si President Ferdinand Marcos Jr. sa iban nga mga lider sa Asya nga pamatukan ang makatalagam nga paggamit sang coast guard kag maritime militia vessels sa West Philippine Sea nga mahimo makapasaka pa sang tensyon kag indi paghangpanay sa ginaagawan nga teritoryo.
Ginhingyo ini sang presidente kadungan sang 18th East Asia Summit nga kadungan man sang 43rd Association of Southeast Asian Nations (ASEAN) Summit sa Jakarta, Indonesia.
Diri ginpabutyag ni Marcos ang kahangawa sang Pilipinas sa padayon kag agresibo nga tikang sang iban nga pungsod sa West Philippine Sea nga maathag nga paglapas sa 1982 United Nations Convention on the Law of the Sea (UNCLOS).
Ginsulit man sini nga indi pagpilion sang Pilipinas nga mangin bayolente sa amo nga isyu, apang magapabilin ini sa pag-depensa sa soberanya kag kinamatarong sang pungsod sandig sa nakabutang sa international law.
Magluwas sa Pilipinas, ang naga-claim pa sang teritoryo sa West Philippine Sea amo ang Brunei, Malaysia, kag Vietnam kag ang China nga sang damlag lang nagpaguwa sang mapa nga may yara sang mas ginpasangkad pa nga 10-dash lines. #
