Nakabalik na si President Ferdinand “Bongbong” Marcos Jr. sa Pilipinas kasunod sang iya duha ka adlaw nga state visit sa Canberra, Australia.
Sa iya nga arrival statement, ginpahayag sang presidente nga magapabilin ang Australia nga amo ang isa sa pinakasuod nga abyan sang Pilipinas.
“Australia remains, and will continue to be, one of our closest friends. In the spirit of bayanihan and mateship, we shall forge ahead in fully maximizing the potentials and the gains from this Strategic Partnership between our two forward-looking, law-abiding maritime states,” pahayag sini sa isa ka video message.
Suno sa presidente, kasunod sang pagbisita ni Prime Minister Albanese sa Pilipinas sang Septyembre 2023, nakit-an nga nagasangkad pa ang bilateral engagements sa tunga sang duha ka nasyon sa nagkalain-lain man nga area sang kooperasyon. Ang pinaka-talalupangdon diri suno kay Marcos amo ang kolaborasyon para sa defense kag seguridad.
Maragtason ang pagbisita ni Marcos sa Australia bangud siya ang labing-una nga Filipino president nga nakahatag sang speech sa atubang mismo sang parliament.
Magluwas diri, nangin produktibo man ang lakat sini bangud sa pagpakig-istorya sini sa parliamentary leadership, lakip na sa President sang Senate, ang Speaker sang House of Representatives kag amo man ang leader sang opposition.
“Their support is instrumental in developing an enabling policy environment for the continuous upward orientation for our bilateral relations,” dugang sini.
Sa amo man state visit ni Marcos, napirmahan ang tatlo ka mga kasugtanan sa patag sang maritime cooperation, cyber kag critical technology, amo man ang pagpatuman sang competition laws.
Sa masunod nga weekend, magabalik man si Marcos sa Australia agud nga mag-upod sa iban nga Southeast Asian leaders para sa ASEAN-Australia Summit sa Melbourne. #
