Ginmandu ni President Ferdinand Marcos, Jr. ang paghatag sang local names sa 131 ka mga features sang Kalayaan Island Group (KIG) sa West Philippine Sea.
Ini ang santo sa nakabutang sa Executive Order No. 111 nga pirmado ni Marcos sang Marso 26.
Sa amo nga order, ginmanduan ang National Mapping and Resource Information Authority nga mag-produce kag mag-publish sang updated charts kag mapa nga naga-reflect sang lokal nga mga pangalan sang mga lugar.
Ginmanduan man ang national government agencies kag instrumentalities nga gamiton ini nga lokal nga mga pangalan sa ila nga official communications, messages, kag documents.
Sa sektor sang edukasyon, dapat man nga gamiton ini nga mga pangalan sa educational kag training institutions amo man sa pag-conduct sang research, sa pagpaguwa sang mga textbooks, kag sa pagpreparar sang educational ukon instructional materials.
Gin-cite sang EO ang rekomendasyon halin sa National Maritime Council nga i-adopt ang standard set sang Philippine names para sa 131 features sang KIG sa Kalayaan sa Palawan, agud masiguro ang maayo nga pang-dumalahan sa area kag agud mapakita ang soberanya sang Pilipinas sa West Philippine Sea.
Nahibaluan nga sa idalom naman sang Philippine Maritime Zones Act, mahimo tawgon bilang West Philippine Sea ang maritime zones sang Pilipinas sa western side sang Philippine archipelago lakip na ang Luzon Sea kag Bajo de Masinloc kag maritime features sang KIG.
