ILOILO CITY- Nagahulag ang Maritime Industry Authority agud talupangdon ang nanari-sari nga reklamo sang mga sumalakay nga nagatabok sa Iloilo kag Guimaras.
Sa interview sang Bombo Radyo kay MARINA-6 Regional Director Jose Venancio Vero, iya ginpahayag nga magapakigsapol sila sa Philippine Ports Authority kag Philippine Coast Guard agud istoryahan ang problema sang masami nga tuman ka laba nga pila sang mga pasahero sa Jordan Port kag Iloilo Port kag wala man sang pasilungan ang mga nagalinya nga pasahero kun nagaulan.
Suno kay Vero, magluwas diri, ila man istoryahon ang mga ship owners nga nagabyahe Iloilo- Guimaras and vice versa agud mas mapadasig ang pag-isyu sang tiket sa mga pasahero agud indi na maiyawan s paghulat ang mga ini.
May kaangtanan naman sa guidelines sa pagbyahe sang mga pumpboats, ginpahayag ni Vero nga wala pa sang mando ang Central Office sang ahensya tuhoy sa pag-adjust sa mga guidelines.
Nahibaluan nga base sa guidelines, kinahanglan nga magsuksok sang life-jacket ang pasahero sa bilog nga trip; ang pasakyon nga pasahero ang dapat yara lang sa 75% sang approved carrying capacity sang motorbanca; ang mga overhead tarpaulins/canvass ang dapat nga lukuton ukon kuhaon; ang serbisyo ang alas-6 sa aga tubtob alas-6 lang sa gab-i; ang operasyon ang pahanugutan kun maayo ang tiempo sa diin ang hangin ang dapat yara sa 7-10 knots ukon Force 3 sa beaufort scale, kag ang balod ang may kataason nga indi maglapaw sa 0.5 meter; kag dapat nga may distress signal equipment ang motorbanca.
Natuhoy naman sa pag-phase out sang wooden hulled motorbanca, ginpahayag ni Vero nga gina-evaluate pa nila ini.
Sa subong, ginakilala nila sa gihapon ang validity sang certificates of convenience (CPC) sang mga motorbanca.
