ILOILO CITY– Ginalauman nga makabangon na ang turismo sa Western Visayas bangud sa gin-aprubahan sang National Inter-Agency Task Force nga uniform travel protocols kun sa diin indi na required ang COVID-19 testing kag quarantine para sa mga domestic travelers.
Sa interview sang Bombo Radyo kay Atty. Helen Catalbas, director sang Department of Tourism Region VI, iya ginpahayag nga kun makabawi ang sektor sang turismo, mabuligan man nga makabangon sang madasig ang ekonomiya.
Suno pa kay Catalbas, ang ginpasimple nga travel protocols ang makabulig man sa tourism workers nga makabalik sa ila trabaho.
Kadungan sini, ginpahayag ni Catalbas nga istrikto sa gihapon nga ipatuman ang minimum health and safety protocols agud indi man mabutang sa risgo nga ma-infect ang mga bisita kag ang tourism workers.
Sa idalom sang Resolution Number 101 nga gin-isyu sang IATF sang Pebrero 26, indi na mandatory kundi nagadepende na sa LGU-point of destination kun i-require and COVID-19 testing kag quarantine.
Sa syudad sang Iloilo, una na nagpahayag si Iloilo City Mayor Jerry Treñas nga magasunod ang Iloilo City Government sa bag-o nga resolusyon sang IATF samtang ‘manageable’ pa ang kaso sang COVID-19 sa syudad.
Sa probinsya sang Iloilo, una naman nagpahayag si Iloilo Governor Arthur Defensor Jr. nga i-require sa gihapon ang quarantine kag COVID-19 testing sa mga travelers nga halin sa mga lugar nga may mataas nga kaso sang COVID-19 kag nagaduging nga kaso sang community transmission agud indi man magtimbuok ang COVID-19 cases sa mga banwa sa probinsya.
