Ginatun-an sang Department of Social Welfare and Development (DSWD) ang posibilidad nga pasakaan ang cash grant para sa mga benepisyaryo sang Pantawid Pamilyang Pilipino Program (4Ps).
Ang tuyo sini amo nga buligan ang pigado nga mga pamilya sa tunga sang pagmahal sang mga balaklon ilabi na bangud wala man sang pagsaka ang ayuda nga ila nabaton halin sang nahimo nga layi ang 4Ps sang 2019.
Suno kay DSWD spokesperson Assistant Secretary Romel Lopez, maathag ang mandu ni President Ferdinand Marcos, Jr. nga magpatigayon sila sang pagtuon — kaupod ang National Economic Development Authority (NEDA) kag ang Philippine Statistics Authority (PSA) — agud nga makit-an ang husto nga formula nga gamiton pananglitan kinahanglanon ang saka sa ayuda.
Apang gin-athag man sang natungdan nga indi mahapos ang proseso sa pagpataas sa cash grant bangud kinahanglan pa sini nga amyendaran ang 4Ps Law.
Nahibaluan nga sa idalom sang 2024 budget, yara sa P106.3 billion ang budget para sa 4Ps nga 3.57% nga mas mataas ipaanggid sa P102.6 billion apang suno sa ahensya, wala ini nagakahulugan nga pasakaan subong ang cash grant nga ihatag.
Ang gindugang nga budget subong nga tuig, suno kay Lopez, ang pagagamiton para sa reactivation sang iban nga mga benepisyaryo nga nakakas anay apang nabalik matapos napamatud-an nga pigado man sila gihapon.
Ang 4Ps amo ang national poverty reduction strategy sang gobyerno nga nakasaad sa Republic Act 11310 ukon “An Act institutionalizing Pantawid Pamilyang Pilipino Program (4Ps)” nga pirmado sang Abril 17, 2019.
Gin-ilog ini sa conditional cash transfer scheme sang iban nga mga pungsod kun sa diin ginahatagan sang cash grants ang mga benepisyaryo sa kondisyon nga maka-comply sila sa mga requirements kag kondisyones nga gin-set sa idalom sini nga programa nga ginapangunahan sang DSWD.#
