Gin-updan sang masobra 2,000 ka mga Ilonggo ang Trillion Peso March sa Iloilo City subong nga hapon.
Ginatawag ini nga Kahublagan Kontra Kurapsyon ukon KKK nga kabahin man sang dako nga anti-corruption protest nga ginpatigayon sa nanuhay-tuhay nga bahin sang Pilipinas subong nga adlaw, Septyembre 21.
Alas tres kaina sang hapon, nag-umpisa ang protest walk halin sa atubang sang Jaro Metropolitan Cathedral sa pagpanguna ni Jaro Archbishop Most Reverend Midyphil Billones kag Jaro Archdiocesan Social Action Center (JASAC) director Monsignor Meliton Oso.
Una na nga ginpahayag ni Oso nga posible nga 3,000 tubtub 5,000 ka mga protesters ang maga-upod tubtub sa Iloilo Provincial Capitol grounds agud nga magpanindugan batok sa lapnagon nga kurapsyon.
Mga kabataan ang kadam-an nga nag-upod sa hublag-protesta.
Nakasuksok sang puti ang mga raliyista samtang nagabitbit sang placards nga nagakondena sa kurapsyon sa gobyerno.
Magluwas sa sini nga protesta, may himuon nga concert kontra kurapsyon nga magalawig tubtub karon sa gab-i.
