ILOILO CITY- Magalab-ot sa masobra 5,300 ka mga katapo sang kapulisan kag force multipliers ang iga-deploy sa syudad sang Iloilo para sa Dinagyang Festival 2023.
Sa interview sang Bombo Radyo kay PLtCol Rene Obregon Jr., Chief sang City Operations and Management Unit sang Iloilo City Police Office, iya ginpahayag nga ang amo nga numero ang ginabug-usan sang mga katapo sang Iloilo City Police Office, iban nga units sang Philippine National Police kag mga civil society organizations.
Suno kay Obregon, sa subong, padayon pa ang ila finalization sa mga detalye sang deployment para sa mga minor kag major events.
Nagpahanumdom naman si Obregon nga ginadumilian ang pagdala sang makahulubog nga ilimnon kun nagalakat ukon nagalibot sa syudad sa tion sang festival ukon activities,indi man mahimo maggamit sang drone kun indi accredited sang Iloilo Festivals Foundation Inc., kag dumilian man ang pagpalupok sang firecrackers ukon paggamit sang pyrotechnics kun indi accredited.
May ipatuman naman nga gun ban umpisa sa Enero 13, alas 12:01 sang kaagahon tubtob Enero 22, alas 12:00 sang tungang gab-i.
